وقال الاعلامي إبراهيم عبد الجواد عبر آثير الإذاعة: شايف إن كهربا مشواره بينتهي مع الأهلي، مكنشي انتهى بالفعل، لأن لما تبص لأرقامه وعلى أدائه في الملعب، لا تُخطئ الحكم في إنه بينتهي ووسام اللي لسه جاي مسجل نصف أهدافه في اقل من موسم وهو داخل على خامس سنه ليه في الأهلي.
تابع: كهربا سبب بقائه الرئيسي في النادي الأهلي طوال الفتره دي، هو جماهير السوشيال ميديا، إللي بيقولوا عليه الفولت العالي والمشطشط ويبوس التيشرت، وإنه كان في الزمالك، ده سبب استمراره في الأهلي ما عدا الموسم قبل الماضي اللي تألق بشكل لافت وكان سبب في حصول الفريق على دوري الأبطال
وأردف: لكن لو هتقيم الخمس سنين هتلاقي كم مشاكل وأزمات لا حصر لها، ومش متخيل إنه برغم اهداره ركلة ترجيح في مباراة باتشوكا، يقود لاعبي الأهلي أنهم ميروحوش للجماهير.
وقال ايضا: معلش يا كهربا إنت مين؟ أنا مش أقصد التقليل منك، إنت لاعب محترم، لكن إنت مش من كباتن الفريق، في ناس أقدم وأكبر منك في الفريق، إنت عملت كده بأنهي عين إنت منين جبت الجبروت والقلب ده، إنك أهدرت ركلة ترجيح وتسببت في حزن الجماهير، وأرقامك أبيض على الأبيض، إنت حتى مش قادر تجري، فإنت جايب القلب والاستقواء ده منين؟!
وقال ايضا: إمام أنا مش قادر أفهمه، بيتقلع التيشرت ليه .. أومال حسام حسن يعمل إيه، ولا خالد بيبو يعمل إيه إللي أحرز 4 أهداف أمام الزمالك في مباراة تاريخية، ومقلعشي التيشرت ومحطش صباعه في ودانه.
واصل: دي مباراة منتهية يا إمام، والشوط الأول كان زي الزفت، والفريق خرج من بطولة الجمهور حزين بسببها، إنت بتعمل لمين كده، إنت لعبت ربع ساعة وبعد المباراة نشرت ستوري الجمهور بيقول فيها عاشور، زي ما كان جمهور الزمالك بيقوله، هو إنت مركز فين؟ ومع مين.
وأكمل: للأسف الشديد قطاع من الجماهير على السوشيال ميديا نفخت لاعبين، وخليتهم يتخيلوا إن السبب الأساسي لبقائهم في أنديتهم هما جماهير السوشيال ميديا، اللاعبين دول مشافوش جماهير بمعنى الكلمة
وأتم: إنت بتخاطب مين يا إمام، إنت بتخاطب جمهور السوشيال ميديا إللي مع كل مراوغة هيرفعك سابع سما؟ لا مش ده إللي هيخليك تستمر، فين صالح جمعة وصلاح محسن، ممكن أعد 60 لاعب فكروا بنفس العقلية ومستمروش.
واختتم حديثه قائلا: انا مستغرب من عقلية إمام وكهربا، وشايف أنهم بيرتكبوا أخطاء بتضيع النعمة إللي هما مش حاسين بيها.
المصدر : وكالات
