قال رضا سليم عبر تصريحات تليفزيونية : شعرت بألم شديد وحاولت الاستمرار في الملعب ولكني للأسف لم استطيع، لسا حتى الان معرفش مدة الغياب عن الفريق ، طبيب الفريق بيتكلم حاليًا مع أطباء خارج مصر من أجل العلاج والعملية الجراحية.
تابع رضا سليم: صحيح جاء لى عروض من الدوري المغربي والقطري ولكن الاهلي كان بيرفض وانا تحت أمر النادي بالخروج كإعارة او البقاء.
أضاف رضا سليم: الشعب المصري من أطيب الشعوب اللي شوفتهم، لما جيت مصر لقيت ناس بتحب الكرة، اكتر حاجه بتفرحهم هيا الكورة، لازم تموت نفسك في الملعب علشان الجمهور يحبك، الجماهير لما بتشوفني بتقولي متزعلش يا رضا والفرصة جايه، في حاجه زعلتني من مشجع بعد مباراة باتشوكا قالي “أنت جاي تاخد فلوس وبس”، بصراحة الكلام دا مش صح انا مش جاي علشان فلوس، انا جاي أكبر إسمي وأدي للنادي لان بحب الاهلي وبحب اللاعبين ، وان شاء الله غداً نرجع أحسن من الأول.
استطرد رضا سليم: جميع المرتبات منتظمة في النادي ومفيش غلط صغير ولا جنيه بيتأخر، النادي موفر كل حاجه للاعبين علشان تكون في الملعب كويس، دي الحاجه اللي ممكن متلاقيهاش في أي نادي أخر غير في الأهلي، إدارة الأهلي أحسن إدارة بالنسبالي.
واصل رضا سليم: لازم حد يتكلم معايا ويتكلم كويس ويكلمني عن النواقص اللي عندي علشان أكون جاهز وأدي بنسبة 100%، ولكن مفيش حد بيتكلم معايا غير كابتن سامي بيقولي معلش واتمرن كويس وان شاء الله خير”.
وأكمل رضا سليم: الادارة مطلبتش مني أكلم يحيى عطية الله أو أشرف داري، لكن اللاعيبة كلمتني، اشرف كلمني سألني علي النادي كويس وكدة وممكن انجح في النادي قولت له الصراحة اللاعيبة كويسة والادارة كويسة والفلوس بتاعتك هتاخدها، أهم حاجة تقدم في الملعب لو جيت وموت نفسك في الملعب النادي هتحبك والادارة هتحبك وتكسب بطولات وتاخد حاجات مخدتهاش قبل كدة، وضحت له كل حاجة، كل حاجة انت محتاجها في القاهرة متاحة، أحسن نادي في افريقيا في كل شئ احسن نادي، قالي كلامك ثقة قولتله بكرة تيجي وتشوف بعينك كل حاجة، يحيي عطية الله لما مضي اتكلمت معاه لكن مكلمنيش قبلها، قولت له مبروك وان شاء الله تكون أحسن لاعب في السنة قال لي “شكرًا” هو مبيتكلمش كتير.
وأتم رضا سليم: هتاف “رضا يا رضا إدلع يا رضا” هو الأفضل بالنسبة لي، الجمهور دائما على حق ولا يصح أن يرد اللاعب على جمهوره عند الغضب بل يجيب تقدير حزنه
واختتم رضا سليم حديثه قائلا : لو النادي محتاج يشيلني من القائمة بسبب إصابتي فأنا تحت أمر الأهلي.. مش هضيع على الفريق مكان لاعب تاني ممكن يفيده.
المصدر : وكالات
