إوعاك تفكر إني حابه وضع بشرحهلك
لكن دا أمر واقع أنا يادوب بوصلهولك
كارهه كوكبي ماعرفتش أنشر فيه مذهبي
لكن لأ هعيش الدنيا على حساباتها
أحرم نفسي ليه من حياة ربنا خلقها؟
دي حقيقة لو بتدور كلام أبوك مزور
إنسى إنك تمشي جنب الحيط عشان متجيش متعور
شوفت الحياة بلونين لون الشارع لون البيت
فعرفت إن الحقيقة مش شبه
ما أنا إتربيت
عيش قوي ومكروه مش ضعيف محبوب
كده كده هيكرهوك لما خيط المصلحة يدوب
وساعتها لو لقوك ضعيف ضهرك مكسور
أكيد هينهشوك وسط الناس في عز النور
من إمتى عملوا حساب وقفة يوم الحساب
ده إخوات يوسف في قتله خلقه لنفسهم أسباب
إبعدهم عن طريقك وكمل المسيرة
ده الإبن البكر الآدم قتل أخوه بدافع الغيرة
إرضى بقانون الغابه واختارلك وش تعيش بيه ،
أما اللي بينافسوك فتنسى يحترموك
هيفضلوا يحاربوك لحد يوم
ما تموت
ده يوم ما مات الفار مشيت في عزاه القطط
مع إن دم الفار على مخالبهم منه نقط
ويوم ما مات الأسد مجاش حيوان العزا
عشان وقفتهم جنبه كانت مجرد خوف من الأذى
أو طمعا في المصلحة أو لأياً كان
شاء القدر بعد ما يعمى البصر مطرة تنحت حجر
فدابت القشرة وده يكشفلك لب نفوس البشر
مفيش بدون مقابل
ده عبادة ربنا بمقابل
لولا الطمع في الجنة
كانت الدنيا أصلاً باظت
مستني إيه ما تقفل مفيش كلام يتقال
