تحدثت نهاد أبو القمصان محامية الفنانة أسماء جلال عن تفاصيل مقاضاة أسماء لـ رامز جلال بعد حلقتها في برنامج «رامز ليفل الوحش»، والذي تعرضت خلالها للتنمر والإيحاءات الجنسية.
نهاد أبو القمصان تكشف تفاصيل مقاضاة أسماء جلال لـ رامز جلال
وقالت نهاد أبو القمصان في برنامج تفاعلكم: إحنا مش ضد أي برنامج ترفيهي.. أسماء كانت عارفة أن ده برنامج ترفيهي وعارفة أنه مع البرنامج ده تحديدًا هيبقى فيه مفاجآت، وهي في الأساس كان عندها بعض التحفظات وتم وعدها أنه هيتم الاحترام للتحفظات دي.
أضافت: «وعشان كدا وافقت على المشاركة، كانت تحفظاتها عدم استخدام الألفاظ الخارجة أو الإيحاءات اللي معروف بيها البرنامج لأن هي شاركت فيه قبل كدة، ومكانتش عايزة تشارك تاني لكن وُعدت أن كل ما سيزعجها مش هيحصل، وعكس ده اللي حصل هي شافت جرعة مكثفة أثناء تصوير البرنامج من كل اللي تحفظت عليه وحاولت أكثر من مرة تقولهم وقفوا التصوير».
تابعت: واتقالها أن الحاجات اللي أزعجتك في التصوير هنشيلها في المونتاج، وفي أول يوم فوجئت بمقدمة فيها قدر هائل من التنمر والإهانة ووصفها بوصف لا يليق ويشكل طبقًا للقانون المصري عدد من الجرائم، كمان زوايا التصوير نفسه كلها فيها تحفظ شديد وهي بترفض الطريقة دي في التصوير.
استكملت: «أسماء جلال أصيبت بصدمة شديدة لمدة يوم أو يومين وهي بتحاول تستجمع قواها وتتناقش حوالين الموقف القانوني وبناءً عليه أعلنا البيان، وإحنا عندنا مطلب واضح وهو اعتذار رامز جلال ليها بشكل واضح عما حدث في البرنامج وأنه يتشال من على المنصات».
واختتمت: «عندنا مطلب واضح هو اعتذار رامز جلال ليها وانه يتشال من على المنصات، وإحنا منقدرش دلوقتي نطالب بعدم عرض الحلقة لأن هي اتعرضت خلاص وموجودة على المنصات، وفيه فرق بين الهزار والمقالب وأني استخدم ألفاظ تصل للجرائم أبسطها التنمر، ولا يوجد في العقد أنها توافق على المقدمة ولم يعرض عليها اسكريبت ما سيقال، وحتى الآن لم نتواصل مع رامز جلال أو أحد من فريقه».
المصدر : وكالات
